Каталіцкія Скаўткі і Скаўты

Адзін са скаўцкіх летнікаў прайшоў пад Івянцом

Летам скаўты заўсёды збіраюцца на вандроўкі, пілігрымкі, летнікі. Адзін са скаўцкіх летнікаў прайшоў 3 жніўня пад Івянцом.

Дзень распачаўся з прыміцыйнай святой Імшы, якую ў інтэнцыі скаўтаў Беларусі цэлебраваў кс. Міхал Бубен, што апякуецца скаўтамі парафіі Св. Сымона і св. Алены ў Мінску. У літургіі ўдзельнічалі скаўты, іх шэфы, а таксама самыя малодшыя — «ваўчаняты» і «божыя кароўкі». Падчас Імшы былі асвечаны арнат і стулы са скаўцкімі крыжамі. Напрыканцы кс. Міхал Бубен удзяліў усім прысутным прыміцыйнае бласлаўленне. 

Другой адметнай падзеяй гэтага дня для скаўтаў было іх штогадовае служэнне на Парафіядзе дзяцей і моладзі Мінска-Магілёўскай архідыяцэзіі, якая праходзіла з 1 па 4 жніўня ў Івянцы. Скаўты рыхтавалі для ўдзельнікаў паласу перашкод. Нават нягледзячы на неспрыяльнае надвор’е, усе заданні былі выкананы выдатна.

Марына Гарашэвіч 

Скаўты з Барысава адзначылі дзесяцігоддзе сваёй дружыны

Каталіцкія скаўты розных узростаў з Барысава сабраліся 2 чэрвеня разам, каб адзначыць 10-годдзе сваёй дружыны — першай барысаўскай дружыны ў гонар бласлаўлёных пакутнікаў з Росіцы. Сустрэча прайшла ў лясным масіве пад Барысавам.

На традыцыйным месцы сустрэчы разам з бацькамі і гасцямі сабралася каля 70-ці чалавек.

Скаўцкі рух дзеліцца на ўзроставыя групы: «ваўчаняты» — 8-11 гадоў, «скаўты» — 12-17 гадоў, «вандроўнікі» — 17 і больш гадоў. 

Самаму юнаму ўдзельніку сустрэчы Адаму, які яшчэ не дарос да таго, каб стаць «ваўчанём», было 3 месяцы. Самаму даросламу скаўту Валерыю, які носіць імя «Каа» ў гонар героя з казак Кіплінга і выконвае абавязкі дапаможнага ў зграі «ваўчанят», — 40 гадоў.

Бацькі з цікавасцю назіралі за метадамі ў занятках з моладдзю, маглі задаваць любыя пытанні і, гледзячы на настрой, які панаваў на месцы збору, былі задаволеныя тым, што ўбачылі.

Падрабязней...

Вандроўка скаўтак у Навагрудак стала часам пазнання кошту хрысціянскай веры

Кошт хрысціянскай веры — такой тэме была прысвечана вясновая вандроўка беларускіх скаўтак вогнішча благаслаўлёнай Мар'яны Бярнацкай. Абраная тэма была невыпадковай, бо дзякуючы ёй скаўткі змаглі паглыбіцца ў разважаннях пра веру, бо гэты год на тое і прызначаны католікам, а таксама ўзмацніцца духам дзякуючы прыкладу благаслаўлёных зямлі беларускай, якія паказваюць кошт веры сваім святым жыццём.

Месца, у якое ішлі скаўткі разам з духоўным кіраўніком свайго вогнішча айцом Сымонам Фарайтэрам OMI, было выбрана невыпадкова: трымалі шлях у Навагрудак. Бадай кожнаму католіку, які жыве ў Беларусі, гэтае месца вядома і з'яўляецца святым: менавіта там жылі, служылі і закончылі сваё зямное вандраванне адзінаццаць сясцёр-мучаніц з Кангрэгацыі Сясцёр Найсвяцейшай Сям’і з Назарэта (назарэтанкі). Скаўткі рушылі ў свой шлях, каб прасякнуцца гэтым духам.

Курс трымалі на Баранавічы, дзе спыніліся ў гасцінных айцоў вербістаў. Затым скаўткі накіраваліся ў бок Ліды. Даехалі да Яцукоў, па дарозе сведчылі пра сябе ў цягніку, бо ва ўсіх узнікала пытанне: «Хто гэтыя дзяўчаты, апранутыя па форме і з крыжам на берэце?» Адным толькі відам скаўтка ўжо сведчыць пра веру ў Хрыста.

Падрабязней...

Пілігрымка ў Гудагай у «вандроўніцкім стылі»

З 9-га па 12-га мая адбылася нацыянальная пілігрымка старэйшых скаўтаў у Гудагай да Маці Божай Шкаплернай — апякункі ўсіх скаўтаў.

Вандроўнікі (старэйшыя скаўты) належаць да парафіяльных груп, якія практыкуюць педагогіку Федэрацыі еўрапейскага скаўтынгу. Традыцыя такіх пілігрымак на Беларусі пачалася ў 2010 годзе, калі вандроўнікі (старэйшыя скаўты) вырушылі ў Росіцу. У 2012 годзе пілігрымавалі ў Вішнева, апошняе месца працы а. Уладзіслава Чарняўскага. Шлях на Гудагай таксама быў абраны не выпадкова. І пачалося падарожжа святой Імшой у прыгожым касцёле ў Солах, ў жупранскім касцёле адбылося маёвае набажэнства, ахвяраванні на будаўніцтва якога збіраў Францішак Багушэвіч (дарэчы, пахаваны ён на касцёльных могілках, і ў касцёле захавалася лава, на якой ён звычайна сядзеў падчас св. Імшы). 

У гэтым годзе нацыянальная пілігрымка сабрала вандроўнікаў з розных парафій Беларусі, а менавіта: Мінска, Гомеля, Гродна, Віцебска, Барысава, Паставаў, Лынтупаў. Таксама да нас далучыліся вандроўнікі са Львова і Золачава (Украіна), каб разам памаліцца і падзяліцца сваім вопытам. Яны прыехалі разам са сваім душпастырам грэка-каталіцкім дыяканам Кіпрыянам з ордэна айцоў базыльянаў. Цікавым госцем для вандроўнікаў стаў Б’ёрн Ларсан са Швецыі, які прыехаў, каб пераняць досвед развіцця каталіцкага скаўтынгу ў Беларусі, бо ў Швецыі на сённяшні дзень яшчэ няма каталіцкіх скаўтаў.

Падрабязней...

Мітрапаліт Тадэвуш Кандрусевіч сустрэўся з федэральным камісарам FSE Марцінам Хафнэрам

15 красавіка ў Мітрапалітальнай курыі ў Мінску адбылася сустрэча Мітрапаліта Мінска-Магілёўскага арцыбіскупа Тадэвуша Кандрусевіча з Марцінам Хафнэрам — федэральным камісарам FSE (Федэрацыі еўрапейскага скаўтынгу).

Марцін Хафнэр наведаў Беларусь упершыню. Мэтай трохдзёнага візіту федэральнага камісара стала жаданне бліжэй пазнаёміцца з парафіяльнымі групамі, якія практыкуюць педагогіку еўрапейскага скаўтынгу ў Беларусі.

На сустрэчы Марцін Хафнэр распавёў пра падрыхтоўку да важнай падзеі ў жыцці скаўтаў, якая адбудзецца ў 2014 годзе, — Еўраджэму. Еўраджэм (Eurojam) — гэта агульнаеўрапейскі скаўцкі летнік, у якім будуць удзельнічаць 10 тысяч еўрапейскіх каталіцкіх скаўтаў з усёй Еўропы. У гэтым мерапрыемстве маюць намер прыняць удзел і каталіцкія скаўты з Беларусі.

Падрабязней...

English French Lithuanian Polish Russian Ukrainian